Innanlands

Tveir nýggir tilburðir staðfestir í Føroyum

Talan er um tvey fólk, sum hava verið á ólavsøku, sum einki tilknýti hava til hvønn annan

(Savnsmynd)

(Savnsmynd)

2020-08-04 12:07 Author image
Alda Nielsdóttir
placeholder

Tveir nýggir koronatilburðir eru staðfestir í Føroyum í dag. Tað vísa nýggjastu kanningarúrslitini hjá Landslæknanum.

Talan er um persónar, sum ikki hava verið í sambandi við hvønn annan. Harumframt er ein triði persónur staðfestur smittaður, men viðkomandi er farin av landinum aftur. Smittan hjá viðkomandi varð staðfest í Danmark eftir fráferð úr Føroyum, í hinum báðum førum eru tilburðirnir staðfestir í Havn og í Klaksvík.

Landslæknin sigur við Kringvarpið, at tey bæði, sum hava fingið staðfest smittuna í Føroyum, bæði hava verið á ólavsøku, og viðkomandi sum fekk staðfest smittuna í Danmark hevur eisini verið í Føroyum um hesa tíð.

Landslæknin mælir nú øllum til at taka støðuna í størsta álvara. Tað er neyðugt, at øll venda aftur til góðu atferðina við góðum reinføri og neyðugu frástøðuni.

– Taka vit okkum ikki um reiggj nú, er veruliga vandi fyri, at smittan fær fastatøkur í Føroyum. Her er talan um tríggjar ymiskar smittuketur, og tí skulu vit brúka stóra orku upp á at smittuuppspora tær ymisku smittuketurnar, sigur Lars Fodgaard Møller, landslækni sambært Heilsumálaráðnum.

Landslæknin heitir á øll fólk, sum hava verið í sambandi við tey smittaðu, um at seta seg í samband við seg á teldupostinum lafm@stps.dk.

Bæði Landsstýrið og Farsóttarnevndin fara at koma saman sum skjótast, nú fleiri nýggir tilburðir eru staðfestir.

Dagførd kl. 12.16

 

placeholder
placeholder