Tvey staðfest frísk og 43 sett í sóttarhald

412 av teimum 423 persónunum, ið hava fingið staðfest koronasmittu í Føroyum, eru nú staðfest frísk, vísa nýggjastu tølini frá myndugleikunum.

Sostatt eru 11 fólk smittað í løtuni – tvey færri enn í gjár. Eisini er viðkomandi, sum var innlagdur við korona á Landssjúkrahúsinum, vorðin útskrivaður.

Síðan í gjár eru 43 afturat sett í sóttarhald, og eru nú tilsamans 57 fólk í sóttarhaldi. Helst er hetta orsakað av teimum fimm nýggju tilburðunum, sum vórðu staðfestir fyrradagin.

109.223 koronakanningar eru nú gjørdar í Føroyum.

Síðan 1. september eru 12 nýggir tilburðir staðfestir í Føroyum.