Ukraina samtykt at avmarka russiskt mentanartilfar

Sunnudagin samtykti ukrainska tjóðartingið tvær lógir, sum skulu avmarka útflýggjan av russiskum bókum og tónleiki.

Eina lógin ger tað ólógligt at prenta bøkur hjá russiskum ríkisborgarum, uttan so at hesir siga russiska ríkisborgaraskapin frá sær og fáa sær ukrainskan ríkisborgaraskap. Hetta verður tó bert galdandi fyri tey, sum høvdu russiskan ríkisborgaraskap eftir Sovjetsamveldið fall í 1991.

Eisini verður bannað at innflyta bøkur, sum eru prentaðar í Russlandi, Hvítarusslandi og hersettum ukrainskum øki við tí fyri eyga at selja tær. Tað verður eisini neyðugt við serligum loyvi fyri at innflyta bøkur á russiskum aðrastaðni frá.

Hin lógin loyvir ikki russiskum ríkisborgarum, sum hava fingið russiskan ríkisborgaraskap eftir 1991, at spæla tónleik í miðlum ella í almennu ferðsluni. Eisini skal meira av tilfarinum í sjónvarpi og útvarpi vera á ukrainskum.

Endamálið við hesum lógunum er at slíta mentanarliga sambandið millum Russland og Ukraina í kjalarvørrinum á russisku innrásini, skrivar Reuters.

Áðrenn hesar lógir kunnu koma í gildi, skal ukrainski forsetin, Volodymyr Zelenskyj undirskriva tær.