Úr Tindhólmi til DR at viðmerkja rúmdarferð

Í morgin verður stóri rakettútskjótingardagur á Kennedy Space Center í USA í sambandi við at rúmdarrakettin Dragon hjá SpaceX verður send út í rúmdina við fýra rúmdarfararum umborð, sum skulu arbeiða úti á altjóða rúmdarstøðini í eitt hálvt ár.

Teirra millum er danin Andreas Mogensen, sum skal út á sína aðru rúmdarferð. Anders Mogensen er fyrsti evropeari, sum er tilknýttur eini amerikanskari Nasa-verkætlan.

Av hesi orsøk fara donsku sjónvarpsstøðirnar at gera nógv burtur úr útskjótingini. Bæði DR og TV2 fara at senda beinleiðis frá útskjótingini.

Danmarks Radio fer at hava gestir í sjónvarpsstovuni, sum fara at viðmerkja og greiða frá tí, sum hendir.

Ein teirra er føroyingurin David Arge Klevang, sum tað mesta av hesi vikuni annars hevur hildið til úti á Tindhólmi, har rúmdargranskarar og jarðfrøðingar hava gjørt royndir av ymsum slag, sum skulu brúkast til at betra um arbeiðsumstøðurnar hjá rovaranum, ið tekur royndir av undirgrundini á reyðu gongustjørnuni.

David fór í dag aftur til Danmarkar, tí hann skal vera í sjónvarpsstovuni hjá DR allan fyrrapartin í morgin.

Per Lundahl Thomsen frá DTU Space við mappuni við nýggja frímerkinum frá Posta. Per fer at viðmerkja fyri TV2 í morgin

Ein annar, sum skal viðmerkja, tað verður í sjónvarpsstovuni hjá TV2, er danin Per Lundahl Thomsen. Eisini hann hevur júst verið í Føroyum. Tað var í ørindum sum serfrøðingur og ráðgevi hjá DTU Space í sambandi við uppgávur til tilknýti til rúmdarídnaðin í Føroyum.

Per Lundahl Thomsen er vinmaður við Anders Mogensen, fekk nýggja frímerkjamappuna, sum Posta júst hevur givið út í sambandi við rúmdarferðina, kallað Munin, sum eftir ætlan byrjar í morgin.

Sum skilst, so hevur Per Lundahl Thomsen játtað at arbeiða fyri, at Anders Mogensen kemur ein túr til Føroya fyri at greiða frá ferðini og rúmdarvirksemi annars, tá hann vónandi er afturkomin til jarðar í øllum góðum einaferð næsta ár.

Frímerkið, sum Posta hevur givið út í sambandi við Huginn-rannsóknarferðina

Eitt lítið føroyskt íkast í rúmdarferðini afturat er, at rúmdarfararnir taka nøkur serstøk ting við sær út í rúmdina – talan er um ting, sum onkursvegna hava mentanarligan týdning.

Anders Mogensen hevur millum annað ein hondbólt við sær fyri at markera heimsmeistarakappingina í hondbólti fyri kvinnur, sum verður hildin í Danmark meðan hann sveimar í ringrás um jørðina.

Hann hevur eisini ting, sum við tilknýti til bókmentirnar. Herímillum eina bamsu, sum ímyndar Rasmus Tøpp, fyllipennin hjá Karen Blixen og slipsið hjá Williami Heinesen!.

Um alt gongur sum ætlað, ikki minst veðrið, so verður Dragon rakettin skotin út frá Kennedy Space Center í morgin, fríggjadagin 25. august, klokkan 8.49.

Manningin, sum eftir ætlan verður sent út í morginárið. Frá vinstru Konstantin Borisov úr Russlandi, Anders Mogensen úr Danmark, Jasmin Moghbeli úr USA og Satoshi Furukawa úr Japan (Mynd: EPA)