USA: Russland stendur aftanfyri eiturálopið á Skripal

USA slær nú fast, at tað var Russland, sum stóð aftanfyri eiturálopið við Novichok á Sergej Skripal og dóttir hansara í mars mánað. 

Tað skriva fleiri útlendskir miðlar, m.a. AP tíðindastovan. Útmeldingin kemur frá amerikanska uttanríkisráðnum, sum samstundis skrivar, at USA fer at seta í verk nýggj revsitiltøk í verk móti Russlandi orsakað av málinum. 

Talskvinnan hjá amerikanska uttanríkisráðnum, Heather Nauert, sigur, at revsitiltøkini móti Russlandi verða sett í verk 22. august, um tey verða samtykt í kongressini. 

USA hevur sligið fast, at "stjórnin í Russlandi hevur brúkt kemisk og lívfrøðilig vápn í stríð við fólkarættin, ella hevur brúkt deyðilig kemisk ella lívfrøðilig vápn ímóti egnum ríkisborgarum", sigur Heather Nauert sambært TV2.

Russland hevur ferð eftir ferð noktað ákærurnar.