Innanlands

Varatingformaðurin í Katalonia vitjar

Tjóðveldi skipar fyri politiskum fundi um støðuna í Spania og Katalonia

Josep Costa (Mynd: EPA)

Josep Costa (Mynd: EPA)

2020-01-14 07:47 Author image
Ingi Samuelsen
placeholder

Politiska kreppan í Spania og Katalonia verður tikin upp til viðgerðar á almennum fundi í Smæruni hóskvøldið, sum Tjóðveldi skipar fyri.

Við á fundinum verður Josep Costa, varaforseti í katalonska tjóðartinginum, umboðandi flokkin hjá fyrrverandi forsetanum, Carles P Puigdemont, Junts per Catalunya.

Støðan í Spania hevur verið ógviliga spent seinastu árini. Í kjalavørðinum av hesum, hava fólkaatkvøður verið í Katalonia um fullveldi. Tann seinasta var í 2017.

Fólkaatkvøðan varð tó ikki góðkend av sponsku stjórnini, og svaraði sponsku myndugleikarnir aftur við stórari fjøld av løgreglufólkum og harðskapi ímóti fólki, ið fóru á val. Eftir fólkaatkvøðuna vórðu níggju katalanskir fullveldissinnaðir politikarir og aktivistar handtiknir, og tey hava síðani verið í varðhaldsfongsli í yvir tvey ár, til tey fingu dóm í oktober 2019 á ímillum 7 og 13 ár hvør. Samstundis eru fleiri katalanskir politikarar í útlegd.

Millum teirra er Carles Puigdemont, fyrrverandi forseti, sum vitjaði í Føroyum í 2018.

Nýggj stjórn er hartil júst skipað í Spania, og er ein av størstu fullveldisflokkunum í Katalonia (ERC) partur av stjórnargrundarlagnum, og treyt fyri, at núverandi forsætisráðharrin í Spania, Pedro Sanchez, hevur meiriluta. Samstundis er leiðarin, Oriol Junqueras, í sama katalanska flokkinum, ERC, í fongsli – fingið 13 ára dóm fyri, at skipað var fyri fólkaatkvøðu um fullveldi.

Nú kemur Josep Costa, ið er samstarvsfelagi hjá omanfyrinevndu, og eisini er varaforseti í katalanska tinginum, til Føroya. Hann kemur at greiða frá støðuni í Katalonia og lagt verður upp til kjak og høvi verður tískil, at seta honum spurningar, skrivar Tjóðveldi í tíðindaskrivi. 

placeholder
placeholder