Verður áhaldandi arbeitt við at seta átøk í verk

Í apríl 2022 varð ein krabbameinsætlan við 69 tilmælum kunngjørd, og tað verður áhaldandi arbeitt við at seta átøk í verk, sigur landsstýriskvinnan í heilsumálum, Súsanna Bertholdsen í svari til fyrispurning hjá Kristionnu Winther Poulsen úr Javnaðarflokkinum.

Eitt av tilmælunum í Krabbameinsætlanini er at seta eitt tvørfakligt krabbameinsráð at ráðgeva landsstýrisfólkinum, m.a. um, hvussu tilmælini skulu raðfestast. Krabbameinsráðið varð sett á heysti í 2022 og í 2023 lat ráðið tásitandi landsstýriskvinnuni síni fyrstu tilmæli, sum í høvuðsheitum snúgva seg um:

• Seta serlækna við palliatión í Sjúkrahúsverkinum.
  
• Seta í verk nýggja ávísingar-og útgreiningarskipan (við útgreiningareind), har ávíst verður til ein felags “postkassa”.
• Skipa eina screeningseind og seta í verk eina landsfevnandi screening fyri tarmkrabba í Føroyum.
• Orða eina nýggja fólkaheilsuætlan, sum leggur dent á sjúkufyribyrgjandi og heilsufremjandi tiltøk sum heild. Samstundis verður mælt til, at tað skal raðfestast at fáa sett nøktandi tiltøk í verk fyri at tálma royking, serliga millum ung.

Landsstýrisvkvinnan sigur, at fleiri átøk longu eru sett í verk.

M.a. eru palliatiónslæknar settir, ein nýggjur CT-skannari og 3T MR-skannari eru tikin í nýtslu, og arbeitt verður eisini við at orða eina nýggja tubbaks- og nikotinlóg. Eitt av málunum við hesari lógini er, at árgangirnir hjá teimum, sum eru fødd í 2025 og seinni verða roykfríir og ikki nýta aðrar tubbaks- ella nikotinvørur.

Landsstýriskvinnan sigur, at hon í heyst ætlar sær at taka samanum tilmælini og í hesum sambandi meta um, hvørji tilmæli enn mangla at verða sett í verk, og hvussu tey eiga at verða raðfest.

Av tilmælum, sum sambært landsstýriskvinnuni eiga at fáa høga raðfesting, og sum arbeitt verður við í løtuni, er m.a. skjót útgreining og at minka um bíðilistan til endoskopi.