Verkfallið hert í morgun

Síðsta mánadag varð verkfall lýst fyri flest allar seingjardeildir í Sjúkrahúsverkinum, og í morgun varð verkfallið hjá sjúkrarøktarfrøðingunum hert.

Frá klokkan 8 í morgun fevndi verkfallið eisini skurðambolatoriið B3 á Landssjúkrahúsinum.

- Vit kunnu nú, eftir eina arbeiðsviku í verkfalli, staðfesta, at Fíggjarmálaráðið als ikki hevur flutt seg nærri samráðingarborðinum, sigur Felagið Føroyskir Sjúkrarøktarfrøðingar.

Herðanin er ein roynd at fáa Fíggjarmálaráðið aftur til samráðingarborðið, og hesaferð at samráðast, heldur enn áhaldandi at diktera sama karm, ið tey hava gjørt síðan apríl, siga sjúkrarøktarfrøðingarnir.