Yvir 1700 fólk hava nú latið lív

Í gjár kravdi coronavirusið 100 mannalív afturat í Hubei-landspartinum í Kina, har virusið stavar frá. Sostatt er talið á deyðum í økinum nú komið upp á 1696, upplýsa lokalu heilsumyndugleikarnir.

Í øllum Kina er talan um 1770 fólk, sum hava latið lív orsakað av coronavirusinum.

Samlaða talið á smittaðum í Kina er nú komið uppum 70.000, skrivar TV2.

Í Hubei-landspartinum hava kinesisku myndugleikarnir nú ásett enn fleiri avmarkingar fyri at minka um smittuvandan.

60 mió. fólk í økinum hava fingið boð um bert at fara útúm, um talan er um eina neyðstøðu.

Eitt nú fær bert ein persónur úr hvørjum húsarhaldi loyvi at fara út triðja hvønn dag fyri at keypa mat og aðrar neyðsynjarvørur, meðan alt virksemi undantikið apotek, gistingarhús, matvøruhandlar og læknamiðstøðir verður fyribils niðurlagt. Eisni er øll privat koyring bannað.

Hubei-landsparturin og høvuðsbýurin Wuhan er tað økið, sum er harðast rakt av coronaútbrotinum, men smittan hevur nú eisini breitt seg til yvir 30 lond.