– Kanska fær USA enn ein stat næsta ár

Í gjár var grønlendski tjóðardagurin, og í hesum sambandi deildi serliga amerikanska sendifólkið til Grønlands, Jeff Landry eina heilsan á sosiala miðlinum X.

Hann ynskti grønlendingum til lukku við tjóðardegnum og vísti eisini á, at USA skjótt kann hátíðarhalda 250 ára dag sum sjálvstøðugt land.

– Kanska kann USA á 251 ára degnum hátíðarhalda stovnanina av 51. statinum, skrivar hann sambært Ritzau.

Tað er 4. juli, at USA, sum í løtuni hevur 50 statir, kann hátíðarhalda 250 ára dagin. Ameirkanski forsetin, Donald Trump hevur fleiri ferðir boðað frá, at hann ynskir at yvirtaka Grønland, m.a. av trygdarávum.

Í hesum sambandi varð Landry, sum er guvernørur í statinum Louisiana, eisini útnevndur til serligt sendifólk til Grønlands.