- Skúlar eiga at hava morgunsang allar vanligar skúladagar

Jógvan á Lakjuni, løgtingslimur fyri Fólkaflokkin, heldur, at skúlarnir eiga at hava morgunsang allar vanligar skúladagar. Tí hevur hann gjørt uppskot til løgtingslóg um at hetta verður krav.

Í viðmerkingunum sigur Jógvan á Lakjuni, at ein av høvuðsuppgávunum hjá fólkaskúlanum er at varðveita mentanararv okkara, og at í fólkaskúlalógini stendur, at skúlin i´sátt og samvinnu við foreldrini skal hjálpa til at geva næmingunum eina kristna og siðalagsliga uppaling.

Jógvan á Lakjuni sigur, at ein partur av mentanararvinum er sangskatturin, og at tað er umráðandi at tað verður sungið við børnum í skúlanum, so sangir og sálmar kunnu verða lærdir til lítar.

Løgtingsmaðurin mælir tí til, at tað verður álagt skúlunum at læra børn og ung vanligar føroyskar barnasangir, fosturlandssangir og sálmar.