– Vit hava tamarhald á smittuni

Hósdagin í farnu viku segði Lars Fodgaard Møller, landslækni, at koronasmittan var leys í samfelagnum, og at tamarhald ikki var á henni.

Les eisini: – Hava ikki tamarhald á smittuni

Orsøkin var, at trý fólk vórðu staðfest positiv, sum ikki vistu, hvar tey kundu havt fingið smittuna. Men talan vísti seg at vera um eitt mistak.

Í gjár varð boðað frá, at tríggjar av royndunum, sum vórðu tiknar 18. august vórðu greinaðar umaftur, og at tær vístu seg at vera negativar. Sostatt minkaði talið á skrásettum tilburðum við trimum.

Lars Fodgaard Møller, landslækni, sigur við Útvarpið, at hann fekk illgruna um, at okkurt ikki var heilt rætt, tá hann hevði tosað við tey trý, sum vórðu staðfest smittað.

– Um mann ikki hevur verið í sambandi við nakrari smittukeldu, eingi sjúkueyðkenni hevur og yvirhøvur ikki skilir, hvussu mann kann vera blivin smittaður, so velji eg eg at kanna fólk á nýggjum, sigur hann.

Landslæknin metir nú, at tamarhald er á smittuni kortini.