– Vit trongja øll til ein góðan Summar Festival

Summar Festivalurin 2022 verður hildin dagarnar 4. til 6. august. Hesum boða fyrireikararnir frá í tíðindaskrivi í dag.

Summar Festivalurin hevur verið raktur av koronutiltøkum seinastu tvey árini, og tann festivalurin, ið skuldi verða í august, varð avlýstur bert triggjar vikur áðrenn, orsakað av almennu tilmælunum og óvissu koronustøðuni.

Fyrireikararnir í Klaksvík hava tó ikki mist mótið og ætla at halda festivalin næsta summar.

– Vit trongja øll til ein góðan Summar Festival, og vit vilja gera okkara til, at hetta kann lata seg gera í 2022. Hesi seinastu tvey árini hava verið tung fyri tey, ið skipa fyri mentanartiltøkum, men tað er umráðandi, at vit ikki gevast á hondum, men vilja virka fyri, at vit aftur fáa tey stóru og góðu summartiltøkini á skrá í Føroyum, sigur Erik Biskopstø, stjóri í Summar Festivalinum.

Forsølan til Summar Festivalin 2022 er byrjað, og vikuskiftispass kunnu nú keypast fyri bíligasta prísin á millum annað heimasíðuni, boðar Summar Festivalurin frá. Samstundis verður kunnað um, hvussu støðan er við gomlu atgongumerkini: 

- Øll, sum ætla sær á Summar Festivalin 2022, skulu keypa nýtt atgongumerki. Atgongumerkini, sum vórðu seld til avlýstu festivalarnar í 2020 og 2021, verða í næstum strikað og afturrindað til tey, ið hava keypt. Landið hevur avgjørt at veit festivalunum stuðul, og beinanvegin hesin stuðul er komin, verða atgongumerkini afturrindað. Hetta verður innan stutta tíð.