15 fráboðanir um stormskaðar higartil

Løgreglan hevur úr at gera í dag við at svara telefonini. Nógv fólk hava ringt á støðina fyri at boða frá stormskaðum.

- Higartil hava vit fingið 15 fráboðanir um stormskaðar, sigur vaktleiðarin á løgreglustøðini.

Hóast fimtan stormskaðar eru fráboðaðir, so er enn eingin løgreglubilur sendur.

- Vit biðja eisini fleiri um at venda sær til brandstøðina við fráboðanini, sigur vaktleiðarin.

Nakrir av fráboðanunum eru m.a. ein tekja, sum fór í Skálabotni, ein tekja, sum fór í Kollafirði, og í Miðvági vóru tey bangin um ljósmastrarnar, sum standa við MB vøllin.