15 særd í álopi á Kyiv í nátt

Ukrainski høvuðsstaðurin Kyiv varð í nátt raktur av einum russiskum rakett- og dronuálopi, og í minsta lagi 15 fólk vórðu særd.

Vrakpetti frá dronum duttu niður í fleiri býarpartum, og eisini varð boðað frá fleiri eldsbrunum.

Sambært ukrainsku loftverjuni vórðu 14 rakettir og 250 dronur skotnar móti málum í Ukraina. Høvuðsmálið var Kyiv. Álopið verður umrøtt sum eitt av størstu samskipaðu loftálopunum undir krígnum, sum byrjaði í februar 2022, skrivar Ritzau.

Ukrainskir myndugleikar boða eisini frá, at tvey fólk vórðu dripin fríggjadagin undir einum russiskum dronuálopi í havnabýnum Odessa í sunnara parti av Ukraina, og eisini vórðu fleiri særd í álopinum.

Mikudagin og hósdagin boðaði russiska verjumálaráðið frá ukrainskum dronuálopum. Sambært russum vórðu yvir 300 ukrainskar dronur skotnar niður mikudagin, og 159 dronur vórðu skotnar niður hósdagin, skrivar Reuters.