27 prosent av øllum skúlanæmingum vóru við

Væleydnaða tiltaki við at skipa fyri skúlafótbólti í Marghøllini í Vági, verður uppafturtikið komandi skúlaár.

Í farna mánaði var finalan í Skúlafótbólti. Talan var um eitt tað størsta fótbóltstiltakið í Føroyum nakrantíð, tá 750 børn kappaðust til finaludagin í Marghøllini.

- Tá farið varð undir tiltakið tíðliga á sumri 2018 høvdu vit eina vón um at fáa eini 500-600 næmingar til hetta fyrsta árið. Men nú vit hava gjørt árið upp, kunnu vit staðfesta, at tað hava verið 2.409 leikarar, sum hava luttikið í Skúlafótbólti 2018/2019, skriva stigtakararnir í tíðindaskrivi.

Tilsamans hava tað verið umleið 27 prosent av øllum næmingunum í føroyska fólkaskúlanum til Skúlafótbólt 2018/2019. Fyri summar árgangir, t.d. 5., 6. og 7. flokk, vóru tað fleiri enn 40 prosent av næmingunum, sum vóru við. 25 fólkaskúlar og 5 miðnámsskúlar luttóku í Skúlafótbólti 2018/2019.

Tilsamans 221 lið vóru við, býtt á 69 dreingjalið, 56 gentulið og 96 blandað lið. Hesi liðini spældu tilsamans 596 dystir. Tilsamans blivu 3.448 mál skorað til Skúlafótbólt kappingarárið 2018/2019.

Skúlafótbóltur er eitt av stóru grassroot fótbólts-tiltøkunum í Føroyum, og tiltakið er eisini fyrireikað og skipað av lokalum eldsálum, sum hava brúkt tíð og orku upp á tiltakið.

Nú avgerð er tikin um at endurtaka tiltakið komandi skúlaár, eru fyrireikingarnar nú farnar ígongd, og ínæstum verða skriv send út til fólkaskúlar og miðnámsskúlar um kappingina.