27.027 løntakarar í oktober

Í oktober mánað vóru 27.027 løntakarar í Føroyum. Talið av løntakarum er støðugt vaksið seinastu fimm árini, vísa hagtøl hjá Hagstovu Føroya.

Av teimum 27.027 løntakarunum vóru 14.058 mannfólk og 12.969 konufólk. Talið er rættiliga javnt vaksandi millum kynini, tó hómast ein lítil vøkstur í talinum av mannligum løntakarum í mun til kvinnuligum.

Flestu løntakararnir arbeiða innan almennari tænastu. Í hesum høvuðsvinnugreinini vóru 9560 løntakarar í oktober. Næst eru privatu tænastuvinnurnar, har 9001 løntakarar vóru. 4314 løntakarar vóru í fiskivinnuni og aðrari ráevnisvinnu, meðan 4152 løntakarar vóru í byggivinnuni og aðrari tilvirking.