61 ár í kommunalari tænastu

Miðskeiðis á seinrapartinum í gjár var hátíðarhald í hølunum hjá Vegadeild Runavíkar kommunu í grótbrotinum á Lambareiði. Teir starvandi á deildini og partur av umsitingini í Ráðhúsinum vóru møtt. Høvið var, at teir báðir Súnfríður Højgaard, maskinførari, og Jóanes Johannesen, ruskumsitari og parkeringsvørður o.a., báðir úr Søldarfirði, hava verið í starvi á Vegadeildini hjá kommununi í ávikavíst 30 og 31 ár, skrivar Runavíkar kommuna.

Borgarstjórin flutti teimum báðum eina røðu og helt m.a. fyri, at støðan var í meira lagi kafkask, tí vanliga verða starvsfólk heiðrað á hendan hátt, táið farið verður um 25-ára hvarvið í tænastu. Onkursvegna er teir báðir, hóast ikki gloymdir, dotnir niður ímillum tveir borgarstjórar, men so trúgvir teir eru í tænastuni, var skaðin ikki størri enn tað, at hátíðarhaldið var seinkað í nøkur ár. Bøtt er nú um drálið.

Frá kommununi fingu teir blómur og hvør sín málning við motivum úr heimbygd teirra, sum rituvíkingurin Hilmar Højgaard hevur málað.