63 valevni at velja í millum

Í gjár vórðu valevnislistarnir til fólkatingsvalið, sum verður 5. juni, latnir valnevndini. Freistin at lata inn listarnir var klokkan 18 í gjárkvøldið.

Nú er greitt, at 63 føroyingar stilla upp úr seks flokkum.

Allir flokkar, sum hava umboð á løgtingi í løtuni, stilla upp, uttan Miðflokkurin.

Teir flokkarnir, sum hava flest valevni eru Sambandsflokkurin og Javnaðarflokkurin, sum hava 15 valevni hvør. Fólkaflokkurin og Tjóðveldi hava 13 valevni hvør, og Framsókn hevur 6 valevni, meðan Sjálvstýri hevur eitt.

Sambært Kringvarpinum er talan um tilsamans 26 kvinnur og 37 menn.

Kynsbýtið í ymsu flokkunum sær soleiðis út:

Fólkaflokkurin 3 kvinnur og 10 menn

Sambandsflokkurin 5 kvinnur og 10 menn

Javnaðarflokkurin 7 kvinnur og 8 menn

Sjálvstýri 1 maður

Tjóðveldi 8 kvinnur og 5 menn

Framsókn 3 kvinnur og 3 menn