Innanlands

8 fingu klipp og 4 fingu treytaða frádøming av koyrikortinum

Løgreglan kannaði ferðsluna í Eysturoynni í gjár og í nátt

Savnsmynd

Savnsmynd

2019-01-10 08:20 Author image
Alda Nielsdóttir

Í gjár og í nátt var løgreglan úti og gjørdi ferðamátingar í Eysturoynni. Í hesum sambandi vóru 12 sakir skrivaðar.

Á Kambsdali fingu fýra bilførarar klipp í koyrikortið, og tveir fingu treytaða frádøming av koyrikortinum. Í øllum førum var talan um bilførara, sum ikki helt hámarksferðina.

Loyvt var at koyra 80 km/t, men hesir koyrdu allir millum 107 og 119 km/t.

Í Søldarfirði fingu trý fólk klipp í koyrikortið, og ein fekk treytaða frádøming av koyrikortinum. Her var talan um bilførarar, sum koyrdu millum 77 og 86 km/t, har loyvt var at koyra 50.

Í Norðskálatunlinum steðgaði løgreglan eisini tveimum bilførarum. Ein fekk klipp í koyrikortið, og ein fekk treytaða frádøming av koyrikortinum.

Bilførarar, sum ikki halda hámarksferðina fáa klipp í koyrikortið, og tá ferðin fer uppum 111 km/t er revsingin treytað frádøming av koyrikortinum.

Ein treytað frádøming merkir, at viðkomandi skal upp til nýggja koyriroynd innan tríggjar mánaðar fyri at varðveita rættin at koyra bil.

 

 

placeholder
placeholder