Amnesty: Russland fremur grov brot á altjóða rætt

Russisku krígsgerðirnar í Ukraina byggja víðari á skipað brot móti mannarættindunum. Hetta staðfestir Amnesty International í ársfrágreiðing síni.

Sambært frágreiðingini er álopið á Ukraina eitt grovt brot á altjóða rætt. Amnesty heldur, at gróðrarbotnurin fyri krígsgerðunum er skaptur við at landið í eitt longti tíðarskeið hevur hildið teimum, sum stríðast fyri mannarættindunum niðri.

Felagsskapurin vísir á stóra mannarættindaligar trupulleikar í Russlandi og Hvítarusslandi, millum annað avmarkaða framsøgu- og pressufrælsið. Samstundis minnir Amnesty á, at tað ikki bert eru í hesum londum, at mannarættindini ikki verða hildin.

Sum dømi verða nevnd umfatandi politisk runublaking móti journalistum í Bosnia og Hercegovina og Kroatia. Eisini í Bulgaria, Kekkia og Slovenia hava myndugleikarnir roynt at ávirka public-service miðlarnar.

Harafturat kemur, at Turkaland framvegis er eitt av londum, sum hevur sent flest journalistar í fongsul, skrivar finska kringvarpið, YLE.

Amnesty skuldsetir eisini heimsins ríku lond fyri sjálvsøknan koppsetingarpolitikk. Sambært felagsskapinum hava tey ríku londini keypt skamtir í milliónatali undir seg av koronaheilivági. Keyp, ið ikki hava verið neyðug, og sum hava gingið út yvir tey fátækaru londini.

Eitt nú hava yvir 70 prosent av øllum fólkum í ES londunum fingið koppseting, meðan tilsvarandi talið millum fólkið í Afrika liggur undir átta prosent.