Apríl apríl... lumpaði nakar teg?

Tað munnu vera nøkur sum eru dottin í felluna í dag, 1. apríl. Einasti dagur í árinum, har tað er lov at lúgva og lumpa fólk.

Nú dagurin nærkast endanum hava vit funnið nakrar av teimum almennu aprílsøgunum fram niðanfyri.

Donald Trump vitjar í Føroyum

Norðlýsið lumpaði føroyingar við, at amerikanski forsetin, Donald Trump, skuldi koma til Føroya, nú mótmælisgongur eru ímóti amerikonskum vitjanum í Grønlandi.

Les søguna á nordlysid.fo

Tað sama gjørdi Dimmalætting, sum vildi vera við, at løgmaður hevur boðið Donaldi Trump til Føroya á toppfund at viðgera framtíðarstøðuna hjá Føroyum. Hann kemur longu í næstu viku.

Les søguna á dimma.fo

--

Nick Carter byggir risa summarhús á Velbastað

Og so var tað Góðan morgun Føroyar, sum helst mundi leypa kløkk á nøkur. Rúni Djurhuus var í telefonini, og hann kundi greiða frá - ja meira ella minni kunngera, at Nick Carter frá Backstreet Boys hevði heitt á hann, um at fáa eitt grundstykki til vega á Velbastað. Tað hevði eydnast at fingið fatur á einum 3000 fermetrar stórum grundstykki og tekningar vóru gjørdar til eitt summarhús upp á 500-600 fermetrar.

Rúni Djurhuus vild i vera við, at Nick Carter ætlaði til tíðir at koma til Føroya at taka sær av løttum í einum hektiskum gerandisdegi.

Hoyr samrøðuna við Rúna Djurhuus í Góðan morgun Føroyar. Spola fram til 1:07:30

--

Havstovan gjørt stovnsmeting og veiðutilmæli til føroyska silvurfiskastovnin

Frá at silvurfiskar fyri nøkrum árum síðani bara vóru í hendinga húsi í Føroyum, eru silvurfiskar nú at finna í nærum hvørjum húsi.

Tí hevur Havstovan gjørt eina stovnsmeting av tí føroyska silvurfiskastovninum. Ætlanin er, at einstøku húskini kunnu søkja um silvurfiska-fiskiloyvi, og á henda hátt fáa eitt peningaligt ískoyti til húsarhaldið.

Les søguna á hav.fo

--

FSF áleggur øllum leikarum at brúka goggu

Um orsøkin til álagt verður øllum leikarum at brúka goggu, sigur FSF vera hendingin í dystinum millum EB/Streym og KÍ sunnudagin. VP sigur, at hetta er fyri trygdina hjá leikarunum.

Les søguna á vp.fo

--

Nú verður Eysturoyggin ein kommuna

Hóast eingin av borgarstjórunum enn vil úttala seg alment, so hava nakrir longu óalment vátta at hałd er í tíðindinum um, at Eysturoyggin leggur saman í eina kommunu.

Tá ið Eysturoyarportalurin fekk orðið á borgarstjóran í Runavíkar kommunu tíðliga í morgun var svarið bert: “Hoc est magnum mendacium. memento quo die est.”

Les søguna á eyp.fo

--

80 metrar høgur skorsteinur komin á Tvøroyri

Kristin Michelsen hevur tikið avgerð um, at skorsteinurin hjá Varðanum Pelagic skal vera hægri enn tann í Fuglafirði, og tí verður hann 80 metrar heldur enn 60 metrar. Skorsteinurin er komin við serútgjørdum skipi úr Noreg, sigur Tvøroyrar kommuna.

Les søguna á tvk.fo

--

Skrivliga váttan frá konuni

Málingahandilin Sri var eisini í skemtiliga horninum. Á Facebook varð boðað frá, at tey javnan frá klagur frá konufólk, sum siga, at menn teirra velja skeivan lit.

Tí skuldu øll mannfólk, ið vilja blanda máling ein ávísan lit, hava skrivliga váttan frá konuni um, at hon hevur góðkent litin.

Síggj søguna á Facebook

--