Átta stilla upp fyri Miðflokkin í høvuðsstaðnum

Átta valevni stilla upp fyri Miðflokkin á býraðsvalinum í Tórshavnar kommunu, millum teirra er formaðurin í flokkinum, Jenis av Rana, kunngjørdi flokkurin í tíðindaskrivi í gjárkvøldið.

– Virðing og kærleiki til einstaka menniskjað má setast framum asfalt, betong, skrivstovuveldi og egin áhugamál. Veik, óhjálpin, heimleys, sjúk og fátøk verða raðfest og tryggjað, so ongin dettur niðurímillum. Hjartað verður sett fremst í samskiftinum við borgaran. Kommuna er fyri øll og má rúma øllum, stendur m.a. í valskránni hjá flokkinum.

Millum málini, sum Miðflokkurin sigur seg vilja arbeiða við, er ókeypis sálarfrøðihjálp til borgarar undir 15 ár, frítíðarkort til børn og ung, og sosialar íbúðir við leigugjaldi svarandi til inntøku.

Á listanum hjá Miðflokkinum í Tórshavnar kommunu, eru:

• Anna Margretha Otthamar, toymisleiðari
  
• Jens Knudsen, tónleikalærari
  
• Jenis av Rana, lækni
  
• Kári Arge Kamminga, arbeiðsmaður
  
• Matilda Sivertsen, kosmetolog
  
• Nikkel Heinesen, námsfrøðingur
  
• Rani A. Skaalum, lærari
  
• Vilhelm Hendrik í Skálanum, sølumaður