Sverri Egholm
Fyri triðju ferð í dag setti Jógvan á Lakjuni, løgtingsformaður, tingfundin í dag fyri síðani at niðurleggja hann beinanvegin. Hetta hendi klokkan 18, og orsøkin er, at bíðað verður eftir áliti frá vinnunevndini um málið um sjófeingi.
Jógvan á Lakjuni segði við útvarpið klokkan 18, at hann fer at geva vinnunevndini skoðbráð til klokkan 20 ella 21 í kvøld at koma við áliti. Um álit ikki er komið tá, má støða takast til hvat síðani skal henda.
Um málið kemur úr nevndini í kvøld, kann onnur viðgerð av sjófeingi verða hósdagin og triðja viðgerð leygardagin. Hetta um løgtingið ikki fer at víkja frá tíðarfreistum fyri at sleppa til hús í jólafrí fríggjadagin.
Greitt er, at eitt álit kemur frá andstøðumeirilutanum og eitt frá samgonguminnilutanum í vinnunevndini.
Ein broyting verður, at eingin endalig uppboðssøla við langtíðarloyvum verður. Tey tonsini, 7000 tons av makreli, 10.000 tons av norðhavssild og 40.000 av svartkjafti verða koyrd í eina pulja saman við tí sum í dag eru menningarkvotur, segði Jacob Vestergaard, landsstýrismaður í fiskivinnumálum, við útvarpið í kvøld.
Tann puljan skal brúkast til nýmenning, og tað verður landsstýrismaðurin sum í kunngerð býtur út, segði Jacob Vestergaard.
Vinarliga broyt tínar kennifíla - og privatlívsstillingar fyri at síggja hetta innihald