Borgarstjórin førdi fólk til Bjargamansdal

Virkið vár er afturvendandi tiltak í Klaksvíkar kommunu, har skipað verður fyri ymiskum tiltøkum, ið eggja borgarum til millum annað at røra seg og uppliva ymiskt í kommununi.

Í gjár, mánadagin 1. mai, var fyrsta tiltakið á skránni, og var tað borgarstjórin sjálvur, ið var ferðaleiðari á longri túri.

Myndir: klaksvik.fo

Hetta skrivar Klaksvíkar kommuna á heimasíðu sínari. Har verður greitt frá, at nøkur 40 væluppløgd fólk gingu túrin til Bjargamansdal, ið liggur sunnarlaga á Borðoynni. Túrurin tók áleið 4 tímar.

- Á túrinum, og tá ið komi var fram til húsini í Bjargamansdali, greiddi Karl frá áhugaverdum siðvenjum og søgum, sum eru knýttar at leiðini og ikki minst húsinum, sum vórðu endurreist í 2020, aftaná ein eldsbruna í 2018. Rani Nolsøe hevði gittara við og spældi hann bæði egin løg og undir til tríggjar felagssangir. Sigast má, at løtan varð serstøk, tá fólk sungu sangirnar: Tað er vakurt í Klaksvík á sumri, Sóljugentan og Heimstaðið.

Virkið Vár er í gongd alla vikuna í Klaksvík - sí skránna her.


Alt ferðalagið við endurreista húsið - Rani Nolsøe við gittara (Myndir: klaksvik.fo)



Fleiri myndir frá túrinum á klaksvík.fo