Brúka dronur til farmaflúgving millum lond

Eitt bretskt dronufelag, kallað Windracers, hevur nú fingið loyvi frá bretsku flogferðslumyndugleikunum at flúgva stórar farmaberandi dronur úr bretskum rúmi inn í flogrúmið hjá aðrari tjóð.

Fyrsti millumtjóða flogtúrur við teirra dronum – vit kunnu eisini kallað tað ómannað flogfari – verður frá Tingwall flogvøllinum í Hetlandi til flogvøllin í Haugesund í Noregi.

Hetta er fyrstu ferð, at ein langtrøkkandi drona hevur fingið loyvi at flúgva úr bretskum loftrúmi inn í loftrúm hjá øðrum landi, skrivar Shetnews.

Talan er um ein túr á 235 enskar miles, svarandi til góðar 378 kilometrar.

(Mynd: Windrade)

Dronan ella flogfarið, sum Windracer brúkar til ferðina, kann lasta upp til 150 kilo, og kann røkka túsund kilometrar.

At brúka dronur til farma- og postflúgving er meira vanligt í Bretlandi, enn tað er á okkara leiðum. Á bretsku oyggjunum er vanligt, at dronur flyta post og eitt nú heilivág út til fjarskotin búpláss.

Felagið Windrace sær eisini stórar møguleikar í at brúka flogfør sum hetta til at flyta smáar lastir út til fjarskotin pláss. Flogfarið kann lenda á staðnum, men tað er eisini møguligt at sleppa lastini í fallskíggja.

Windrace hevur longu tikið sær av flutningi av farmi innanoyggja í Hetlandi, og haðani til Orknoyggjar og til fjarskotnu Fair Isle.

Sum skilst, er fyrsta flúgvingin millum Tingwall og Haugesund ikki flogin enn, tí veðrið ikki hevur loyvt tí.