Deyður stórhvalur rekur í Nólsoyarfirði

Ein deyður stórhvalur liggur og rekur í Nólsoyarfirði. MRCC fekk fráboðan beint eftir kl. 8 í morgun frá báti, sum hevði stima seg á deyða stórhvalin.

Stórhvalurin varð funnin millum Tjørnunes og Glyvursnes..

MRCC hevur sent eina ávaring út, bæði umvegis Útvarpið og á teirra egna radio.

Tað er ikki altíð at ein ávaring verður send út, men stórhvalurin rekur í einum øki, har nógvir bátar sigla. Hann kann serliga verða til ampa fyri smærri bátar.

Vanliga verður deyður stórhvalur sleipaður út eysturum og sleptur har. Men í løtuni er ikki vist nær nakar bátur hjá MRCC er tøkur til uppgávuna.