Hóskvøldið skal Tórshavnar býráð taka støðu til eitt uppskot um at samtykja at heimila umsitingini at fara undir forkanningar viðvíkjandi møguleikanum um at byggja eina nýggja høll í Gundadali.
Í sambandi við samráðingarnar um yvirtøku av Gundadalshøllini í fjør varð gjørd ein støðulýsing av verandi høll, og høllini tørvar rímiliga umfatandi umvælingar komandi árini, skrivar Tórshavnar kommuna á heimasíðuna.
– Í sambandi við ætlan um at útbyggja er hugsanin at gera forkanningar viðvíkjandi ymiskum byggiloysnum, herundir loysnir við undanframleiddum bygningseindum, har kostnaðurin kann haldast niðri og byggitíðin kann styttast.
– Lendið norðanfyri høllina er í ávísan mun byggibúgvið frá byggingini fyrst í áttatiárunum, tá ætlanirnir upprunaliga vóru um eina dupulthøll. Hugsanin er bæði at kanna bygging av høll afturat verandi høll, og eisini at bygd verður nýggj dupulthøll.
– Kanningarnar verða gjørdar fyri at fáa betri grundarlag fyri politiskari støðutakan um framtíðar loysnir, við bæði fíggingartørvi, rakstri-og viðlíkahaldi og við funktión í huga.
Vinarliga broyt tínar kennifíla - og privatlívsstillingar fyri at síggja hetta innihald