Earth Hour í Fuglafirði

Eins og undanfarin ár skipar Fuglafjarðar kommuna fyri Earth Hour í morgin, leygardagin 27. mars kl. 20.30, sum WWF leggur upp til verður gjørt um allan heim.

– Earth Hour er eitt átak móti ovurnýtslu í okkara tíð, við fokus á hart trýsta náttúru-margfeldni, umhvørvis-trupulleikarnar og veðurlagsbroytingarnar, sum eru íkomin av ovurnýtslu. Tí verða øll óneyðug ljós sløkt stórt sæð um allan heim, allastaðnis í tímanum millum kl. 20.30 og 21.30, eisini í Fuglafirði, á Kambsdali og á Hellunum, skrivar kunningarstovan í Fuglafirði.

Hetta er fimta árið á rað, at Fuglafjarðar kommuna heldur Earth Hour við einum tónleikatiltaki. Sjálvt í fjør, í ringastu koronatíð, var kortini eitt tónleikatiltak í Fuglafirði í hesum sambandi. Tá spældi Jóhan Hentze niðri frá Mentanarhúsinum, og tónarnir bórust um allan býin, so fólk kundu gleðast um teir - saman, men hvør sær - í myrkalagda býnum.

Men í ár sleppa føroyingar aftur at vera saman, eisini í kirkjunum. Tí verður eitt Earth Hour tiltak í Fuglafjarðar kirkju leygarkvøldið kl. 20.30, har Heðin Kambsdal spælir improvisatiónir á ljóðfagra orgulið í kirkjuni, meðan bara kertuljós lýsa kirkjuna upp. Hendan løtan varar í uml. ein hálvan tíma.

Í ár er 'Føroyar móti krabba' sama dag sum altjóða átakið Earth Hour. Tí stendur ein bússa frammi í kirkjuni, so fólk kunnu lata 'streymleysan' stuðul til Krabbameinsfelagið. Sostatt ber til at sløkkja sjónvarpið og ljósini eina løtu, koma oman í kirkjuna og lata tankarnar sveima saman við vøkrum tónum, og síðani fara aftur til gerandisdagin.

– Earth Hour er tímin, tá einstaklingar, fyritøkur, kommunur og býir í øllum heiminum seta umhvørvið í miðdepilin. Fleiri kommunur í Føroyum, gera eisini tað, og hetta hevur við sær, at stjørnuhavið og norðlýsið síggjast væl, um himmalin annars er klárur. So sløkk ljósið og birt vón, saman ella hvør sær!