Earth Hour verður eisini í Eysturkommunu

Í samband við heimsfevnandi átakið Eart Hour, fer Eysturkommunu at sløkkja ljósini, fyri at stuðla átakinum. Hetta gera kommunan m.a. fyri at seta sjóneykuna á umhvørvið og jørðina.

Leygardagin 30. mars hava tit øll møguleika fyri at vera við í hesum átaki. Tað einasta borgararnir skulu gera, er at sløkkja ljósini í ein tíma frá kl. 20.30-21.30.

Veðurlagsbroytingar mugu takast í størsta álvara, og kommunan vilja vera við til at gera mun. Tískil verða gøtuljósini í Leirvík, Norðragøtu, við Gøtugjógv, Syðrugøtu og Undir Gøtueiði sløkt hendan tíman. Samstundis heitir kommunan á bæði borgarar, vinnufyritøkur og stovnar at stuðla átakinum, og sløkkja ljósini hendan tíman, skrivar kommunan á heimasíðuni.

Í 2018 vórðu yvir 3000 sermerktir bygningar myrkalagdir hendan tíman. M.a. Eiffeltornið í París, Empire State Building í New York og Operahúsið í Sydney.

Fyrireikararnir handan átakið, WWF, siga soleiðs:

“Earth Hour er tímin, har fólk kring allan heimin sløkkja ljósini, til frama fyri jørðini. Vit skulu endurreisa sambandi til okkara felags gongustørnu – móður jørð. Tískil sløkkja vit ljósini og birta vón.

Hetta er boðskapurin, tá Earth Hour, undir slagorinum #Connect2Earth enn einaferð leggur heimin í svart, fyri at leggja dent á, hvussu veðurlagsbroytingarnar ávirka náttúru og djóralív. Veðurlagsbroytingarnar skulu steðgast. Vaksandi hitastigini á jørðini hava óhugnaligar avleiðingar fyri túsundatal av veikum vistfrøðiskipanum, og teimum djórum, ið liva í teimum.

- Eysturkommuna sløkkir ljósini og birtir vón til ársins Earth Hour leygardagin 30. mars kl. 20.30-21.30.

Samstundis heitir kommunan á allar borgarar, bæði tey í bili og til gongu, um at vera eyka varin hesa løtuna ljósini eru sløkt.