Einki serligt veður til fýrverk á nýggjárinum

Tað verða eingi serlig líkindi at brenna bál og skjóta fýrverk á nýggjárinum. Tað metir veðurkøni Petur Hans Dahl.

Í samrøðu við útvarpið í morgun greiddi veðurkøni sjómansskúlalærarin frá, at tað verður vindur og lágætt fyri tað mesta tað, sum eftir er av hesum árinum.

Mánadagin, nýggjársaftan verður ættin útsynningur upp í vestan 12 til 16 metrar um sekundi og regn ella ælaveður.

Eisini leygardagin verður nógvur vindur, 8 til 15 metrar, og avfallið kann koma sum vátakavi ella kavi, metir Petur Hans Dahl.