Eitt gott høvi at basa skøruni nú

Hetta er tíðin, tá inræsna skøran rættiliga breiðir seg í føroyska landslagnum, og fleiri eru tær kommunur, ið royna at gera átøk fyri at støðga útbreiðsluni av plantuni.

Ein teirra er Nes kommuna, sum í dag hevur hesa áheitan til borgararnar á heimasíðu sínari. Áheitanin kundi eisini at verið gingin á møti hjá øðrum eisini:

“Í ávísum býlingum í kommununi er skøra. Tí er tað brúk fyri øllum góðum kreftum í arbeiðinum at burturbeina skøruna. Kommunan heitir á borgarar um at hjálpa til við hesum.

Hvussu skal eg gera?

Skøran skal takast upp við rót, og um hetta ikki letur seg gera, skal hon skerast av niðri við rótina, koyrast í ein posa og burturbeinast. Skøran nørist skjótt og flytur seg um mørk, tí er tað eisini í ávísum førum neyðugt at fara útum egið stykkið, eftir avtalu við jarðareigaran, at skera og royna at fáa alla skøruna burturbeinda.

Við at taka blomstrini og burturbeina tey, so eru ongin fræ at nøra seg, og um vit áhaldandi taka plantuna, so fær rótin ikki føði og doyr.

Burturkastið skal avhendast til móttøkufólkið á Endurnýtsluvirkinum hjá kommununi.

Heitt verður á borgarar um at syrgja fyri, at so lítið av mold sum møguligt fylgir við plantuni, tá ið hon verður burturbeind.

Veðurlagið er til vildar hesar dagar, og tí gott høvi at raðfesta hesa uppgávu nú.”

Sí eisini líknandi áheitan frá Runavíkar kommunu