Alda Nielsdóttir
Á sumri í fjør gingu leysasøgur um, at prátsendingin hjá Ellen DeGeneres "The Ellen DeGeneres Show" var á veg í søguna, eftir at fleiri starvsfólk – bæð fyrrverandi og núverandi – høvdu avdúkað, at arbeiðsumstøðurnar á prátsendingini vóru vánaligar, og at fleiri framleiðslufólk vístu "eina happandi atferð".
Ein kanning varð sett í verk, og fleiri framleiðslufólk vórðu koyrd úr starvi.
Sendingin hjá Ellen DeGeneres heldur tó fram, men sambært nýggjum hyggjaratølum, hevur talið á hyggjarum ikki verið tað sama síðan september í fjør.
Ellen DeGeneres hevur biðið um umbering, bæði í einum opnum brævi og í fyrsta parti í nýggjastu og 18. sesongini av "The Ellen DeGeneres Show".
Síðan september hevur hyggjaratalið ligið um 1,5 mió. Í sama tíðarskeiði árið fyri, lá hyggjaratalið á 2,6 mió. Sostatt er talan um eina afturgongd á 43 prosent, skrivar Vanity Fair.
Sendingin hevur mist 38 prosent av hyggjarunum í høvuðsmálbólkinum – kvinnur undir 54 ár, og tað sigst eisini, at sendingin hevur mist uml. 20 prosent av lýsingarinntøkunum.
Vinarliga broyt tínar kennifíla - og privatlívsstillingar fyri at síggja hetta innihald