Eyðgunn Samuelsen forkvinna í fíggjarnevndini

Bíðað hevur verið í allan dag eftir at tingfólkini skuldu gerast samd um hvussu løgtingsnevndirnar skulu skipast. Og nú beint fyri klokkan 18 var býtið greitt.

Fyri Javnaðarflokkin er Eyðgunn Samuelsen forkvinna í fíggjarnevndini, Bjarni Hammer er formaður í uttanlandsnevndini. Landsstýrismálanevndin verður skipað fyri Hans Jacob Thomsen sum formanni.

Tjóðveldi fær formanssessin í rættarnevndini, og tað er Hervør Pálsdóttir, sum fer at røkja tann sessin. Sólvit Nolsø í Framsókn er formaður í mentanarnevndini.

Andstøðan fær tveir formanssessir. Erhard Joensen í Sambandsflokkinum, sum í undanfarna valskeiði var formaður í fíggjarnevndini, verður nú formaður í vinnunevndini. Jørgen Niclasen í Fólkaflokkinum, verður formaður fyri trivnaðarnevndina.

Fyrivarni skal takast fyri, at nevndin skipar seg á fyrsta fundi, men avtala er um hesi forfólkini.