Eystanstevna nýggjan samleika

Um eina viku, vikuskiftið 14.-16. juni verður Eystanstevna.

Eystanstevnan er ein av siðbundnu føroysku summarstevnunum. Stevnurnar vóru í nógv ár størstu summartiltøkini í Føroyum. Hesi seinnu árini eru tó festivalar og onnur stór tiltøk av ymsum slagi komin, og hesi hava trýst summarstevnurnar.

Hesi seinnu árini hevur Eystastevnan leitað aftur til upprunan. Stórur partur av virkseminum hevur verið á ítróttarøkinum við Løkin og í Bylgjuni. Og soleiðis verður aftur ár. Runutusk verður fyriskipað í náttúruvakra lendinum við Toftavatn, og øll Bylgjan er karmur um Bylgjulandið, sum hevur hópin av tiltøkum allan leygardagin.

Runutusk, Bylgjulandið og ikki minst føroya størsta gummibátatreff umboða nýhugsan í stevnuhøpi, meðan setan, midnáttarsamkoma og ítróttartiltøk annars umboða tað siðbundna.

Ynskið við stevnuni er, at Eystanstevnan skal vera tann virkna stevnan - við siðbundnum og nýhugsaðum virksemi hvørt um annað, og har øll finna okkurt stuttligt at taka lut í, skrivar Runavíkar kommuna á heimasíðuni.

Fyriskipararnir leggja somuleiðis dent á, at stevnan skal vera ódýr hjá familjum at vitja, og vóna at síggja nógv fólk í Runavík næsta vikuskifti.

Eystanstevnan hevur fingið nýggjan samleika, sum Petur Hansen hevur staðið fyri.