Fara at kanna hvussu kostur og rørsluvanar ávirka vágan fyri krabba

Sjúrður F. Olsen, professari og yvirlækni á Statens Serums Institut, og onnur fara í næstum at kanna neyvari, hvussu nógv kostur og rørsluvanar ávirka vágan hjá okkum fyri at fáa krabba.

Danska Krabbameinsfelagið hevur játtað eina hálva millión krónur til verkætlanina, sum er eitt framhald av kanningum, sum longu eru gjørdar. Játtanin kemur frá átakinum Knæk Cancer 2021.

Í Danmark og Noregi hava granskarar í tveimum stórum vísindaligum kanningum fylgt 180.000 børnum úr móðurlívi og frameftir. Tey elstu børnini í kanningunum eru nú 24 ár.

Granskingartoymið ætlar at víðka kanningarnar við leypandi at savna upplýsingar um kost og rørsluvanarnar hjá luttakarunum, og fer hetta at geva eina einastandandi vitan um, hvussu kostur og rørsluvanar ávirka vágan hjá okkum fyri at fáa krabbamein, skrivar Granskingarráðið.

Sjúrður F. Olsen er atknýttur professari á Fróðskaparsetrinum.