Ferðavinnufelagið fegnast um menningarætlanina hjá Visit Faroe Islands

- Nógv góð og tiltrongd mál eru sett á skrá í menningarætlanini, og Ferðavinnufelagð tekur undir við flestu tættum í ætlanini. Ein umráðandi táttur í menningarætlanini er tilmælið til politisku skipanina um nýggja lóggávu fyri gongd í haga. Hetta fegnast Ferðavinnufelagið um, tí talan er um størstu avbjóðing í ferðavinnuni í løtuni. Okkum tørvar landsfevnandi skipanir, ið kunnu tryggja eina væl skipaða ferðavinnu.

Soleiðis skrivar Ferðavinnufelagið um nýggju menningarætlanina hjá Visit Faroe Islands.

Ferðavinnufelagið ger tó vart við, at tað eisini er umráðandi at ásanna, sum framløgan eisini vísti á, at talið av útlendskum ferðafólkum í Føroyum enn er lágt og er t.d. væl lægri enn í londum, sum vit vanliga samanbera okkum við, so sum Gotland, Áland og Orknoyggjar, og ferðafólkavøksturin í Føroyum er bara uml. 10% um árið. Tað er hørð kapping um ferðafólkini, tí flest øll lond vilja hava fleiri ferðafólk. Tí heldur Ferðavinnufelagið ikki, at tað rætta er at avmarka ferðafólk, ið vilja koma til Føroyar, tí tað er ikki víst, at onnur koma ístaðin. Heldur eiga vit framhaldandi at menna allar partar av ferðavinnuni og skipa allar partar av vinnuni so mikið væl, at øll hava møguleika fyri at leggja pening eftir seg, og at vit kunnu gerast enn fleiri, ið liva av hesi vinnu. Tað eigur at verða arbeitt miðvíst við at fáa meira burturúr øllum ferðafólkunum, eisini cruise-vinnuni, og Ferðavinnufelagið vónar, at Visit Faroe Islands og í hesum føri cruise-vinnan saman finna eina loysn.

Cruise-ferðafólk leggja eisini pening eftir seg í Føroyum og eru við til at tryggja lívsgrundarlagið hjá fleiri starvsfólkum í ferðavinnuni. Hendan vinnan er væl skipað av fólki, ið hava verið í vinnuni í fleiri áratíggju. Cruise-vinnan er við til at halda einum bussflota uppi, ið vit øll hava gagn av. Hon brúkar nógvar føroyskar ferðaleiðarar, og hon leggur nógv eftir seg hjá bæði størri og smærri veitarum í vinnuni, skrivar Ferðavinnufelagið á Industry.fo

Ferðavinnufelagið fegnast um faktasíðuna, sum Visit Faroe Islands hevur í hyggju at gera, og sum hevur til endamáls at tryggja sakligar og rættar upplýsingar um ferðavinnuna. Í framløguni í Norðurlandahúsinum vóru tikin fram dømi um skeiv tíðindi, ið verða borin fram í miðlunum, tí tey byggja á skeiv fakta. Ferðavinnufelagið vónar, at nýggja faktasíðan fer at hava við sær, at kjakið um ferðavinnuna verður lyft á eitt støði, sum í nógv størri mun byggir á fakta og vitan.

Sum tað verður nevnt í menningarætlanini er holl vitan avgerandi fyri, at avgerðir verða tiknar á røttum grundarlagi. Felagið fegnast tí eisini um frambrotið á Vága Floghavn, har hagtøl nú verða savnað inn, sum fara at geva føroyingum vitan um, hvussu nógv ferðafólk koma til Føroya, og hvaðani tey koma. Hetta er eitt frálíkt amboð í skipanini av ferðafólkastreyminum í Føroyum og stýringini av ferðavinnuni.

Ferðavinnufelagið sendir bestu ynki til Visit Faroe Islands við vón um, at menningarætlanin fer at roynast væl, og Ferðavinnufelagið vil gera sítt til at røkka felags málum.