Fimm arbeiðarafeløg hava handað sáttmálakrøv

Havnar Arbeiðarafelag, Føroya Arbeiðarafelag, Klaksvíkar Arbeiðskvinnufelag, Klaksvíkar arbeiðsmannafelag og Havnar Arbeiðskvinnufelag vóru í gjár á fundi við Føroya Arbeiðsgevarafelag, har partarnir handaðu sáttmálakrøv síni.

Sáttmálarnir hjá arbeiðarafeløgunum á privata arbeiðsmarknaðinum ganga út 1. mai.

Arbeiðarafeløgini samráðast saman um nýggjan sáttmála, og sjálvar samráðingarnar byrja beint eftir páskirnar, mikudagin 8. apríl, skrivar Vinnuhúsið.

Føroya Arbeiðsgevarafelag samráðist um 40 sáttmálar á privata arbeiðsmarknaðinum við umleið 20 fakfeløg, og samráðingarnar við arbeiðarafeløgini eru tær fyrstu í nýggju samráðingarrunduni.