Fleiri skotin í mormonkirkju í Michigan

Í minsta lagi fýra fólk vórðu dripin og átta fólk vórðu særd eftir ein skottilburð í einari mormonkirkju í býnum Grand Blanc í amerikanska statinum Michigan seinnapartin í gjár.

Hetta hendi sunnumorgunin amerikanska tíð, tá fleiri hundrað fólk vóru savnað í sambandi við stórari gudstænastu í kirkjuni.

Ein persónur, sum er undir illgruna fyri at standa aftanfyri - ein maður um 40 ára aldur - er deyður. Hann varð skotin av løgregluni.

Sambært løgregluni koyrdi hann í bili gjøgnum høvuðsdyrnar hjá kirkjuni, og síðani loysti hann fleiri skot av og setti eld á kirkjuna.

Løgreglan hevur enn einki sagt um eitt møguligt motiv, skrivar Reuters.