Innanlands

Fólk eru meira varin á sethúsamarknaðinum

Rentuhækkingarnar hava havt við sær, at fólk eru vorðin meira varin, bæði við at selja og keypa, sigur Kára á Dunga, stjóri í Betri Heim

(Savnsmynd: Sverri Egholm)

2023-02-10 14:23

Tíðindaskriv

Eini sethús kostaðu í miðal 2,6 mió. krónur í 2022.

Í Havn kostaðu tey í miðal 3,9 mió. krónur, og í Klaksvík og í Eysturoynni ávíkavist 2,8 og 2,1 mió. krónur.

Miðalprísurin hækkaði 7 prosent í Havn og 11 prosent fyri alt landið í 2022 samanborið við 2021.

Tó so lækkaði miðalprísurin í ávísum økjum í landinum. Í Havn lækkaði prísurin 9 prosent frá 3. til 4. ársfjórðing 2022.

Hækkandi rentur og prísvøkstur hava havt við sær, at fólk eru vorðin meira varin. Hetta sæst aftur í talinum av sethúsasølum, sum í 2022 var tað lægsta í níggju ár.

- Vit hava merkt stóra broyting í útboði og eftirspurningi eftir bústøðum seinastu mánaðirnar. Rentuhækkingarnar hava havt við sær, at fólk eru vorðin meira varin, bæði við at selja og keypa. Hetta merkir samstundis, at prísirnir eru lækkaðir í ávísum pørtum av landinum millum 5-10 prosent, og hann fer væntandi at lækka enn meir í ár, sigur Kára á Dunga, stjóri í Betri Heim.

Hækkandi renturnar hava stóra ávirkan á bústaðarbyrðuna

Bústaðarbyrðan lýsir, hvussu stóran part av inntøkuni eftir skatt eitt par við tveimum børnum undir 7 ár skal brúka uppá at gjalda sítt bústaðarlán.

Í Føroyum var bústaðarbyrðan í miðal 25 prosent í 2022. Tað er ein vøkstur á 2 prosent stig samanborið við 2021.

Bústaðarbyrðan í Havn var 37 prosent, sum svarar til ein vøkstur á 3 prosent stig.
Í Klaksvík og í Eysturoynni var bústaðarbyrðan ávikavíst 27 og 20 prosent. Ein vøkstur á 5 og 2 prosent stig.

Bústaðarbyrðan hesa ferð er roknað út frá einari vektaðari miðalrentu fyri hvørt árið. Av tí, at rentuhækkingarnar í 2022 ikki vórðu framdar fyrr enn á heysti, sæst ávirkanin av rentuhækkingunum bara partvíst aftur í bústaðarbyrðuni. Um bústaðarbyrðan varð roknað við rentuni frá desembur, hevði hon verið 43 prosent fyri Havnina og 27 prosent fyri alt landið.

Bústaðarbyrðan í 2022 er tann tyngsta síðan 2006, tá vit byrjaðu at máta hana. Við støði í verandi rentugongd, er sostatt er ikki óhugsandi, at bústaðarbyrðan verður enn tyngri í 2023, tá rentuhækkingarnar síggjast betur aftur í útrokningunum.

Vinarliga broyt tínar kennifíla - og privatlívsstillingar fyri at síggja hetta innihald