Seinastu dagarnar hevur Fólkaflokkurin kunngjørt fleiri nýggj valevni, sum bjóða seg fram á løgtingsvalinum 8. desember.
Í Eysturoynni, har lokalfelagið hevði uppstillingarfund týsdagin, eru átta fólk á listanum – fimm menn og tríggjar kvinnur.
Millum teirra eru Rógvi Egilstoft, borgarstjóri í Eiðis kommunu, og Uni Rasmussen, núverandi landsstýrismaður í fíggjarmálum.
Á seinasta løgtingsvali gjørdust teir báðir nummar ávikavíst 13 og sjey á listanum hjá Fólkaflokkinum við ávikavíst 227 og 465 atkvøðum.
Onnur á listanum eru:
- Katrin Kjartansdóttir
- Malan Rasmussen
- Símun Jóanesarson Hansen
- Mariann Poulsen Garðalíð
- Eivind Jacobsen
- Bárður á Lakjuni
Lokalfeløgini í Suðuroynni og í Havn hava tvey valevni í part. Tey høvdu uppstillingarfund ávikavíst mikudagin og hósdagin.
Í Suðuroynni stilla Jacob Vestergaard og Jóhan Eli Poulsen upp.
Jacob Vestergaard var landsstýrismaður í fiskivinnumálum fram til desember 2021, tá hann legði frá sær fyri aftur at taka sæti á tingi. Jacob Vestergaard fekk á løgtingsvalinum í 2019 næstflestar atkvøður á fólkaflokslistanum – 783.
Jóhan Eli Poulsen gjørdist á seinasta vali nummar 12 á listanum hjá Fólkaflokkinum við 230 atkvøðum.
Havnar Framburðsfelag, ið er lokalfelagið hjá Fólkaflokkinum í høvuðsstaðnum, hevur tvey valevni, sum stilla upp fyri fyrstu ferð. Tey eru Mona Breckmann Wescott og Grímur Sundstein.
Vinarliga broyt tínar kennifíla - og privatlívsstillingar fyri at síggja hetta innihald