Føroyingar kunnu atkvøða í X Factor

Tá X Factor live fer av bakkastokki á TV2 í kvøld klokkan 19 føroyska tíð, verður tað við tveimum føroyskum luttakarum fyri fyrstu ferð.

Føroyingar eru vanliga raskir at atkvøða bara luttakarar hava familju í Føroyum, men hesaferð er altso talan um toftamannin Kára Fossdalsá og hoyvíkingin Tinu Mellemgaard.

Tina Mellemgaard og Kwamie Liv (Mynd: TV2)

Føroya Tele og Nema boða frá, at tað ber til hjá føroyingum at atkvøða við senda sms til 1234 eins og tað fer at standa á skíggjanum.

Tað sum ein skal hugsa um, er at fylla sær pening á sína “Ver-kontu” ella á “Mítt Nema”.

Portalurin verður til staðar til X Factor showið í kvøld fyri at fylgja við hvussu tað gongur føroysku luttakarunum og gera samrøður aftaná.