Føroyskt sjálvstýri í miðdeplinum í Norðurlandahúsinum

Síðani Russland gjørdi innrás í Ukraina fyri góðum ári síðani hevur í støðugt størri mun verið varpað ljós á Arktis og harvið eisini á Grønland og Føroyar sum sjálvstýrandi øki í Ríkisfelagsskapinum. Trygdarmál eru vorðin raðfest alsamt hægri, nú spenningurin millum Russland og Vesturheimin ikki hevur verið so høgur síðani Kalda kríggið. Støðan hevur so eisini fingið danir at geva Føroyum og Grønlandi  størri ans og hetta sást eisini nú um dagarnar, tá 25 limir í danska felagsskapinum “Udenrigspolitisk Selskab” vóru á námsvitjan í Føroyum. Somu fólk vitjaðu í Grønlandi í fjør.

Endamálið við vitjanini hjá Undenrigspolitisk Selskab er sambært heimasíðuni hjá Norðurlandahúsinum at seta seg betur inn í Føroya søgu og at skilja, hvat føroyingar hugsa og halda um Danmark og restina av heiminum. Tí varð skipað fyri pallborðsfundi, har tríggir kendir føroyingar høvdu framløgur, sum snúgva seg um tjóðskap og visjónina um einar sjálvstøðugar Føroyar. 

Udenrigspolitisk Selskab í Keypmannahavn er sprottið úr mótstøðurørsluni ímóti týsku herðsetingini av Danmark undir seinna heimsbardaga. Evropa var stongt, mørkini landanna millum vóru merkt við píkatráði og harðskapi. Neyðugt var, at fólk fingu áhuga fyri umheiminum og fyri mentanum í øðrum londum. Í dag er heimurin broyttur, men tørvurin á talufrælsi, kjaki og vitan er vaksandi - hetta sama er galdandi fyri Føroyar, føroyingar og teirra vónir, dreymar og visjónir. Evropa er aftur merkt av kríggi og ófriði, og tørvurin á innlit, fatan og samrøðu tvørtur um lond og mentanir er aftur átrokandi.

Udenrigspolitisk Selskab er privatur felagsskapur, sum Fríðrikur krúnprinsur er verji hjá. Øll við áhuga fyri uttanríkispolitikki kunnu vera limir í felagsskapinum. Á odda fyri vitjanini í Føroyum stendur Charlotte Flindt Petersen, stjóri.