Freistin at søkja um ólavsøkuloyvi er 6. juni

Tórshavnar kommuna er nú farin undir at fyrireika ólavsøkuna, sum eftir at hava verið skerd í tvey ár orsakað av koronu, í ár verður aftur sum vanligt við midnáttarsangi og øllum øðrum, sum hoyrir til.

Tað boðar kommunan frá á heimasíðuni, og í hesum sambandi ger hon eisini vart við, at freistin at søkja um loyvi at hava tiltak á kommunalum øki á ólavsøkuni er mánadagin 6. juni.

Freistin at senda inn tilfar til ólavsøkuskránna er 1. juli.

Tórshavnar kommuna sigur, at hóast vit aftur í ar kunnu fáa eina vanliga ólavsøku, er avgjørt at halda fast við eina broyting, sum koronastøðan hevði við sær.

– Í samráð við Tórshavnar Ítróttarráð er avgjørt, at tivoli verður ikki aftur á Skálatrøð. Í staðin fáa skótalið, Tórshavnar Ítróttarráð og aðrir felagsskapir pláss kring miðbýin til básar, tjøld og undirhald eins og í fjør. Hetta ber á sama hátt í sær, at avmarkað verður við kommunalum plássi til aðrar básar. Tó er møguleikin at nýta privat øki sjálvandi til staðar.

Meira kunning um, hvussu ein søkir um ólavsøkuloyvi, sæst her.