Gera nýtt spælipláss í Nesvík

Arbeiðið at gera nýggja spæliplássið við Leguhúsið í Nesvík er byrjað. Hetta skrivar Trúboðin, sum eisini hevur myndir úr Nesvík.

Nýggja spæliplássið fer at minna um tað gamla, men fer eisini at hava okkurt nýtt. Í vikuni er tilfar komið, og fólk eru byrjað at stoypa.

Trúboðin skrivar, at spæliplássið verður klárt, áðrenn børnini koma á summarlegu.

Árligi arbeiðsdagurin í Leguhúsinum í Nesvík verður í morgin leygardagin. Arbeiðsuppgávurnar eru ymiskar og ovmikið er at gera til allar hendur. Bæði kvinnur og menn, ung og gomul kunnu vera við til at gera umstøðurnar í nógv brúkta leguhúsinum enn betri.