Gisèle Pelicot og Pharrell Williams fáa franskt heiðurstekin

Franska Gisèle Pelicot og amerikanski Pharrell Williams eru millum tey 589 fólkini, sum fáa tignarligasta heiðurstekinið í Fraklandi, Légion d'honneur - Heiðursfylkingin - skrivar franska tíðindastovan AFP.

Heiðurmerkini verða handað í sambandi við franska tjóðardegnum í morgin, 14. juli, skrivar Ritzau.

Gisèle Pelicot vakti ans, tá hon í fjørvitnaði móti fyrrverandi manni sínum í einum máli um hópneyðtøku.

Fyrrverandi maður hennara, Dominique Pelicot, fekk 20 ára fongsulsrevsing fyri í níggju ár at hava skipað fyri hópneðtøkum av táverandi konu síni.

Málið vakti serliga ans í Fraklandi, tá Giséle Pelicot bað um at fáa upplýsingarnar í málinum lagdar fram alment, og hon er síðani heiðrað fyri dirvi sítt.

Les eisini: Loyvdi minst 50 monnum at neyðtaka konu sína

Pharrell Williams er kendur úr tónleikaheiminum sum sangari, rappari og framleiðari. 

Légion d'honneur varð stovnað av Napoleon Bonaparte í mai 1802, og fram til 1851 kundu bert menn fáa hendan heiður. M.a. Margreta drotning, Fríðrikur kongur og Mary drotning eru heiðrað.