Gongur við rúkandi ferð við svimjihøllini

Svimjihøllin verður bygd í norðrara enda av Bylgjuni, og leggur tvær lonir aftrat verandi bygningi.

Stutt eftir, at avtalan millum Runavíkar kommunu og Kanjon um bygging av svimjihøll varð undirskrivað 27. oktober, fór Kanjon í gongd við arbeiðið, sum er mett at taka góð tvey ár.

Longu eina viku eftir undirskriving var nógv virksemi í økinum, og tey sum ferðast har javnan, leggja merki til, at har broytist skjótt.

Eftir innleiðandi fyrireikingar var fyrsta stigið at taka gamla millumbygningin niður. 

Kanningar tíðliga í tilgongdini vístu, at tann bygningurin, sum ikki bleiv renoveraður, tá Bylgjan varð útbygd við fimleikahøll í 2014, ikki hóskaði sum partur av nýggju svimjihøllini.

Næsta stigið var at grava omanav, og er tað komið væl áleiðis. Í seinastuni er eisini sprongt í økinum, skrivar Runavíkar kommuna.

Higartil hevur arbeiðið við svimjihøllini gingið skjótt og væl, og verður hon væntandi liðug á vári 2025.