Grønland ynskir tættari samstarv við ES

Grønlendska landsstýrið, Naalakkersuisut, sær møguleika í tættari samstarvi við ES.

Tað segði Jens-Fredrik Nielsen, landsstýrisformaður, á einum tíðindafundi í ES-tinginum í Strasbourg í dag.

Fyri fyrstu ferð skuldi ein grønlendskur landsstýrisformaður í dag halda røðu íES-tinginum.

- Vit eru fegin um tann stuðul vit fáa. Seinastu seks til átta mánaðirnir hava verið eitt sindur undarligir hjá okkum, fyri at siga tað milt, segði Jens-Frederik Nielsen, og sipaði til trýstið grønlendingar hava kent frá USA og Donald Trump, forseta.

Jens-Frederik Neilsen segði í Strasbourg í dag, at Grønland ynskir at samstarva við javnsett lond og altjóða felagsskapir, herundir ES.

- Vit ynskja meira samstarv og eitt strategiskt samstarv við ES. Tætt samband við ES og ES-londini kann vera til gagns fyri báðar partar, segði grønlendski landsttýrisformaðurin.

Grønland gjørdist 1. januar 1973 partur av evropeiska felagsmarknaðinum saman við Danmark. Men eftir eina vegleiðandi fólkaatkvøðu í Grønlandi, valdi Grønland at taka seg úr EF 1. februar 1985.

Og Grønland er ikki á veg inn í ES, staðfesti Jens-Fredrik Nielsen.

Ritzau skrivar, at ES serliga er áhugað í einum samstarvi um orku og ráevni, og Grønland er áhugavert, tí Grønland hevur nøkur av teimum ráevnunum, sum ES-londini eru áhugað í.

Eitt nú ráðevni, ið eru avgerandi fyri grøna skiftið, tí tey eitt nú verða brúkt í battaríum til elbilar.