Gunnvá Guttesen sett sum varastjóri á Landssjúkrahúsinum

Landsstýriskvinnan í fíggjarmálum, Ruth Vang, hevur gjørt av at seta Gunnvá Guttesen sum varastjóra á Landssjúkrahúsinum. Gunnvá verður samstundis partur av leiðsluni fyri samlaða Sjúkrahúsverkið.

Hesum boðar Sjúkrahúsverkið frá seinnapartin. Um nýggja varastjóran við sjúkrarøktarfrøðiligari bakgrund skrivar ls.fo soleiðis:

- Gunnvá Guttesen er 52 ára gomul, varð útbúgvin sum sjúkrarøktarfrøðingur í 1997 á Bispebjerg Hospital og hevur starvast í føroyska heilsuverkinum síðani 2001. Hesi árini hevur Gunnvá verið bæði varaleiðari og deildarleiðari á barnadeildini á Landssjúkrahúsinum, umframt at hon sum verkætlanarfólk var við at verkseta talgildu heilsuskipanina í Føroyum.

Seinastu fimm árini hevur Gunnvá verið depilsleiðari á Medisinska deplinum og eigur ein týðandi leiklut í stóru menningini av størsta deplinum á Landssjúkrahúsinum. Hon skal nú nýta sínar eginleikar til millum annað at vera við í arbeiðinum at sameina Sjúkrahúsverkið.

Gunnvá Guttesen tekur við starvinum sum varastjóri tann 1. juni 2023.