Hagstovan: Innflutningurin minkaður 852 milliónir krónur

Fyrra hálvár í 2024 innfluttu føroyingar fyri 5,1 milliard krónur. Tað er ein minking á 852 milliónir krónur ella 14,3 prosent samanborið við sama tíðarskeið í fjør.

Minkingin í innflutninginum stavar í høvuðsheitum frá lægri innflutningsvirði á brennievni og skipum, skrivar Hagstovan.

Innflutningurin av brennievni og øðrum oljum er minkaður 72 milliónir krónur - 8,1 prosent - sum í høvuðsheitum stavar frá lægri prísum.

Innflutningurin av maskinum, motorum, skipum og akførum er minkaður við 574 millión krónum, ella 31 prosentum. Hetta er fyri tað mesta skip.